Grípa til sérstakra öryggisráðstafana hér á landi

Tekin hefur verið ákvörðun um að auka sérstakar öryggisráðstafanir hér á landi vegna hryðjuverkaárásanna í París. Haraldur Johannessen ríkislögreglustjóri fundaði í gær með Sigmundi Davíð Gunnlaugssyni forsætisráðherra og Ólöfu Nordal innanríkisráðherra vegna málsins.

Gefur ekki upp hvers eðlis ráðstafanirnar eru

„Það voru ákveðnar öryggisráðstafanir sem við fórum í strax um helgina og erum enn að vinna að. Það verður ábyggilega unnið að því næstu daga og kannski vikur, án þess þó að ég geti farið nákvæmlega út í þá sálma, eðli máls samkvæmt,“ segir Haraldur.

Aðspurður hvort talið sé að aukin hætta sé á hryðjuverkum hér á landi segir hann að hættustig hafi verið hækkað hér á landi í kjölfar árásanna á Charlie Hebdo í janúar, og að það hafi haldist óbreytt síðan þá.

„Við teljum rétt að vera áfram með okkar viðbúnað á þessu svokallaða meðallagi hættustigs, þar til annað kemur í ljós. Eins og við öll vitum þá er aldrei hægt að útiloka hættur. Það er aldrei hægt að gefa loforð um að ógnaratburðir verði ekki. Lögreglan hefur hins vegar þá skyldu að gera það sem við getum til að tryggja öryggi borgaranna og það er það sem við höfum verið að reyna á undanförnum dögum,“ útskýrir hann.

Auka þurfi styrk lögreglunnar

Þegar Haraldur er spurður hvort íslenska lögreglan sé nægilega vel í stakk búin til að mæta hugsanlegri hryðjuverkaógn, segir hann ljóst að auka þurfi styrk lögreglunnar.  Auknar fjárveitingar þurfi, mannafla og frekari sérfræðiþekkingu á sviði öryggismála.

„Við höfum verið að ræða það undanfarin misseri. Við fjölluðum um það á fundinum með ráðherrunum að lögreglan þyrfti að fá þann styrk á ný sem hún hafði fyrir hrunsárin. Lögreglumönnum hefur fækkað umtalsvert og við teljum að það þurfi að fjölga þeim að minnsta kosti í þá veru sem hún var á sínum tíma og jafnvel gott betur,“ segir hann.

„Einnig þarf að styrkja ákveðnar einingar að mínu mati hjá embætti ríkislögreglustjóra sem fást við öryggismál sérstaklega, og þá er ég að tala um greiningadeild, sérsveit embættisins og alþjóðadeild. Þær deildir sem koma helst að öryggismálum.“

Þá segir hann að auka þurfi löggæslu almennt. „Íslenska lögreglan þarf ekki sérstaklega að auka eftirlit sitt með flóttamönnum. Það sem við þurfum einna helst að gera er að auka löggæsluna almennt til að takast á við þau verkefni sem nútíminn kallar á, og það eru allskyns verkefni. Til dæmis stór aukinn fjöldi ferðamanna í landinu, netafbrot, skipulögð glæpastarfsemi og fleira. Lögregla þarf að geta tekist á við þessi verkefni og haft yfir að ráða mannafla með sérfræðiþekkingu til að eiga við þau.“

Aukið svigrúm til vopnaburðar

Þá segist hann ekki þeirrar skoðunar að það eigi að vopnavæða alla lögreglu landsins, en að skoða megi aukið svigrúm lögreglunnar til að bera vopn.

„Það má hugleiða með hvaða hætti er hægt að bæta þarna úr, en það er það sem við höfum verið að nefna á undanförnum árum. Þessi umræða hefur verið við líði í all langan tíma eins og menn þekkja,“ segir Haraldur Johannessen.