Jennifer Lawrence og Natalie Dormer kysstust fyrir slysni

Leikkonurnar Jennifer Lawrence og Natalie Dormer áttu í skemmtilega klaufalegum samskiptum á rauða dreglinum í London í gær. Leikkonurnar, sem voru að veita viðtöl við frumsýningu nýjustu kvikmyndarinnar úr Hunger Games-myndaröðinni, lentu þá í því að kyssast á munninn í örskamma stund þegar Lawrence ætlaði að kasta kveðju á Dormer.

Þetta skondna atvik náðist á myndskeið, sem má sjá hér að ofan. Lawrence ætlaði greinilega að kyssa Dormer, sem var þá í viðtali, á kinnina. En fólk á það til að misreikna sig í svona aðstæðum og Dormer tókst að snúa sér að Lawrence akkúrat þegar sú síðarnefnda smellti á hana kossi.

Þeim var greinilega báðum skemmt yfir atvikinu, sem og spyrlinum sem benti Dormer á að hún hefði fengið á sig eitthvað af varalit Lawrence.

„Ég mun ná Jennifer Lawrence framan úr mér,“ grínaðist Game of Thrones-stjarnan áður en hún kvaddi.