Bílskúrinn: Rússnesk rúlletta

Lewis Hamilton kom fyrstur í mark, Nico Rosberg hætti keppni og Kimi Raikkonen gerði Mercedes að heimsmeisturum bílasmiða 2015.

Þetta og fleira í Bílskúrnum, uppgjöri hvers kappaksturs hér á Vísi.

Hvernig verður Hamilton meistari?

Ef Hamilton nær í níu stigum meira en Sebastian Vettel og tveimur stigum meira en Rosberg í næstu keppni í Austin, Texas verður Hamilton heimsmeistari ökumanna annað árið í röð og í þriðja skipti á ferlinum.

Nái Hamilton að koma fyrstur í mark í Austin þarf Vettel að verða annar til að halda voninni á lífi. Rosberg má ekki við miklu, tvö stig eru lítið í Formúlu 1 í dag enda 25 stig í boði fyrir fyrsta sæti.

Raunin er sú að Hamilton er kominn með aðra hönd á þriðja heimsmeistaratitilinn en vill ekki ræða það mikið fyrr en það er komið.

„Hey, þetta er ekki komið í hús ennþá, spurðu mig aftur ef ég landa titlinum,“ sagði Hamilton aðspurður hvernig það verður að vera þrefaldur heimsmeistari í Formúlu 1.

Bottas var brjálaður

Valtteri Bottas á Williams var ný búinn að taka fram úr Sergio Perez á Force India og var kominn í þriðja sæti. Raikkonen kom strax á eftir honum fram úr Perez. Skömmu seinna kom Raikkonen að innanverðu inn í beygju og reyndi að taka fram úr Bottas.

Afleiðingarnar voru þær að Bottas beygði fyrir Raikkonen og þeir lentu í samstuði sem batt enda á keppni Bottas á síðasta hring. Grátlegt fyrir Bottas enda á leið á pall. Hann var líka á góðri leið með að tryggja Williams gríðarlega mikilvæg stig.

Hann var að vonum svekktur eftir keppnina. „Mér er eiginlega sama hvort Kimi verður refsað, ég fæ ekki stigin og fer héðan stigalaus,“ sagði Bottas eftir keppnina.

30 sekúndum var bætt við keppnistíma Raikkonen í refsiskyni. Hann kom í mark í fimmta sæti en varð áttundi með refsingunni. Það gerði það að verkum að Mercedes varð heimsmeistari bílasmiða 2015.

Það má því segja að Raikkonen hafi gert Mercedes að meisturum. Það er einnig áhugavert að skoða ákvörðun dómaranna. Það er engin föst regla um hvað gerist þegar ökumaður er keyrður út úr keppninni í þriðja sæti á síðasta hring svo dómararnir höfðu í raun ákvörðunarvald um það hvort Mercedes yrðu meistarar.

Hvernig komst Perez á pall?

Seinni öryggisbíllinn kom út þegar Romain Grosjean á Lotus lenti á varnarvegg á 12. hring. Þá skaust Perez inn á þjónustusvæðið og skipti um dekk. Hann gerði það ekki aftur í keppninni.

Perez sýndi góðan akstur og mikla þolinmæði við að spara dekkjunum. Bottas og Raikkonen komu svo fljúgandi að honum þegar stutt var eftir af keppninni. Perez varðist vel og gerði allt sem hann gat á gjörónýtum dekkjum.

Perez endaði svo uppi sem eini eftirlifandi í rússneskri rúlletu um þriðja sætið með þremur þátttakendum. Raikkonen keyrði Bottas út úr keppninni og skemmdi bílinn sinn og haltraði heim.

Verður Red Bull vélarvana?

Bernie Ecclestone segir að þótt Red Bull hafi fengið neitun hjá Mercedes geti nei stundum þýtt kannski. Ecclestone talar svona í alvörunni hann er jú einráður í Formúlu 1. Kannski er bara Red Bull-Mercedes liðið til að fylgjast með á næsta ári.

Ferrari hefur boðist til að skaffa Toro Rosso 2015 vélar sínar. Liðsstjóri Red Bull, Christian Horner fór á fund Renault í vikunni. Væntanlega með skottið á milli lappanna. Enda sleit Red Bull einhliða samningi sínum við Renault eftir að hafa þegar úthúðað Renault með skömmum í fjölmiðlum. Ekki fallegur skilnaður það.

Hver veit hvort Red Bull hefur vél á næsta ári, enginn í augnablikinu. Vonandi skýrist það á næstu dögum eða vikum. Það væri eftirsjá eftir Red Bull úr Formúlu 1.

Getur Ferrari keppt við Mercedes 2016?

Mercedes liðið er þegar byrjað að nota vélina sem það ætlar að byrja með á næsta ári. Ferrari íhugar nú að gera það sama. Kannski verður vélin notuð í næstu keppni í Austin, Texas í Bandaríkjunum. Hugmyndin er þá að nota síðustu fjórar keppnir tímabilsins sem hreinan undirbúning fyrir næsta ár.

„Sú staðreynd að Sebastian er annar í keppni ökumanna núna breytir stöðunni aðeins. Við erum með vasareiknanna uppi við og erum að skoða hvað er best fyrir okkur að gera,“ sagði Maurizio Arrivabene, liðsstjóri Ferrari.

Komi til þess að Ferrari noti nýju vélina þá þurfa báðir ökumenn liðsins að sætta sig við refsingu í kjölfarið enda báðir bryjaðir að nota fjórðu vél ársins.

Já, vonandi getur Ferrari keppt við Mercedes á næsta ári. Það bendir ýmislegt til þess að keppnin verði harðari 2016.

„Ég vona að Sebastian verði meiri ógn á næsta ári, ég held að það gæti verið svakalega skemmtileg barátta okkar á milli,“ sagði Hamilton aðspurður um hugsanlegar framfarir Ferrari. Toto Wolff, liðsstjóri Mercedes var á sama máli, hann sagðist reyndar trúa því að sú verði raunin. Það yrði væntanlega goðsagnakennd barátta Hamilton gegn Vettel.