Google endurskipulagt undir nafninu Alphabet

Fyrirtækið Google hefur nú farið í gegnum mikla endurskipulagningu. Fyrirtækinu hefur verið skipt niður í hin ýmsu fyrirtæki sem öll eru undir nýju eignarhaldsfélagi sem fengið hefur heitið Alphabet. Fjárfestar hafa tekið endurskipulagningunni vel og verðabréf fyrirtækisins hækkuðu hratt í verði í kjölfar tilkynningar frá Alphabet.

Það sem af er árinu hafa hlutabréf í fyrirtækinu hækkað um 25 prósent.

Larry Page, framkvæmdastjóri Alphabet, sendi út tilkynningu um endurskipulagninguna nú í kvöld. Hana má sjá hér.

Samkvæmt Bloomberg verða hin ýmsu verkefni Alphabet undir mismundandi fyrirtækjum, sem gefa þeim meira gegnsæi og sveigjanleika. Tæknirisinn er með tærnar víða og árið 2013 stofnaði Google fyrirtækið Calico, sem hefur það markmið að koma í veg fyrir dauða eða lengja líf fólks.

Þannig geta til dæmis Google, Youtube, Android mobile software, Google Ventures, Google Capital og Google X, allt orðið einstök fyrirtæki í eigu Alphabet. Það gefur fjárfestum betri innsýn inn í gang hvers hluta Alphabet fyrir sig. Á vef Business Insider kemur hins vegar fram að Google haldi í raun hinum hlutum tæknirisans á floti.