57 laxar gengnir í gegnum teljarann í Elliðaánum

Elliðaárnar eru í góðu vatni þessa dagana og það virðist vera ágætis gangur á laxagöngunum í ánna.

Í morgun þegar Veiðivísir hitti veiðimenn við bakkann voru komnir 3 laxar á land, allir úr Sjávarfossi, ásamt því að nokkuð var reist af laxi á flugur þar á meðal í fossinum sem þykir nú frekar meiri maðkaveiðistaður. Staðan í laxateljaranum sýnir líka að það er ágætis gangur í göngunum miðað við árstíma en staðan í honum er 57 laxar sem hafa gengið í gegn. Fyrir ofan teljarann sáust laxar í Ullarfossi, Hleinatagli, Stórhyl, Kerlingaflúðum og einn lax lá fyrir ofan Árbæjarstíflu.

Elliðaárnar hafa verið feykilega vinsælar meðal félagsmanna SVFR og flest árin hefur það verið þannig að færri fá en vilja veiðileyfi í hana. Þegar vefsalan hjá félaginu er skoðuð eru nokkrar lausar stangir í lok ágúst, sem er frábær tími og þá sérstaklega á efri svæðunum sem eru að öllu jöfnu frísvæði og eingöngu veidd með flugu. Nú þegar forúthlutun er löngu lokið er gott tækifæri fyrir þá sem vilja renna í ánna að ná sér í veiðileyfi.