Laxinn mættur í fleiri ár

Fréttir berast af löxum sem hafa verið að sýna sig í fleiri ám og eftirvæntingin eftir fyrstu stóru göngunum er mikil.

Staðfestar fregnir af löxum hafa borist frá Víðidalsá, Flókadalsá, Langá á Mýrum, Hítará, Laxá í Aðaldal, Ytri Rangá, Grímsá, Korpu, Laxá í Kjós og Laxá í Dölum en líklegt verður þó að teljast að hann sé mættur víðar þó hann hafi ekki verið að sýna sig. Miðfjarðará hefur auk þess opnað fyrir veiðimönnum og var nokkuð líf í ánni en alls komu fjórir laxar á land á fyrstu vaktinni. Árnar opna núna hver af annari og eftir slaka veiði í fyrra bíða margir spenntir eftir því að sjá hvernig ánum reiðir af fyrstu dagana.

Nokkuð af lausum leyfum er í mörgum ánum sem má klárlega skrifa á síðasta ár sem gerir veiðimenn raga við að bóka sig í árnar, í það minnsta fyrr en skýrari merki sjáist um að veiðin verði viðunandi. Verði það staðreyndin að göngurnar skili sér þá á sala veiðileyfa eftir að taka góðann kipp og þá sérstaklega meðal innlendra veiðimanna því meirihluti erlendra veiðimanna hefur þegar bókað sín leyfi og það er ekki stór hópur meðal þeirra sem stekkur á leyfi með stuttum fyrirvara.