Markmiðið var að vera ekki neðstur

Ívar Ragnarsson sló í gegn í keppni með loftskammbyssu á Smáþjóðaleikunum í gær. Þessi fertugi kappi, sem byrjaði að æfa í fyrra, var í harðri baráttu við Íslendinginn Thomas Viderö, sem vann þessa grein á leikunum fyrir tveimur árum, og Boris Jeremenko frá Mónakó sem sigraði loks. Thomas varð þriðji.

„Ég skráði mig fyrst í Skotfélagið í lok árs 2013 og keppti svo í apríl í fyrra í fyrsta sinn,“ segir Ívar sem vann silfur á sínu fyrsta móti. „Það kom mörgum á óvart en mest af öllum mér sjálfum.“

Hann segir að árangurinn í gær hafi farið fram úr sínum björtustu vonum. „Takmark mitt var að verða ekki neðstur og því get ég ekki verið annað en ánægður,“ sagði Ívar sem var í forystu framan af þar til Jeremenko náði forystu með fullkomnu skoti sem gaf 10,9 stig. Eftir það skaut hann betur en Ívar í nánast hverri umferð.

„Stór hluti af því skrifast á reynsluleysi hjá mér,“ segir Ívar sem veit ekki hvað tekur við hjá sér. „Ég ætla bara að halda áfram. Ég hef ekkert leitt hugann að því að keppa erlendis því ég verð mjög stressaður fyrir keppnir. Það verður svo að koma í ljós hvort ég komist í landsliðið fyrir næstu Smáþjóðaleika enda margir góðir skotmenn hér. En ég stefni á það.