Sonur Michael Schumacher vann Formula 4 í fyrstu tilraun

Sjaldan fellur eplið langt frá eikinni segir einhversstaðar og það á líklega við hér. Sonur Michael Schumacher, Mick, tók þátt í sínum fyrsta Formula 4 kappakstri í Þýskalandi um helgina og gerði sér lítið fyrir og vann eina af þremur keppnum helgarinnar.

Hann varð níundi í þeirri fyrstu á föstudaginn, tólfti á laugardaginn en fyrstur í gær, sunnudag. Alls ekki slæmur árangur það hjá nýliða og mjög í stíl við árangur föður hans. Því miður var pabbi hans ekki viðstaddur þegar hann náði þessum óvænta árangri, en hann er enn að ná sér eftir hræðilegt skíðaslys sem hann lenti í um jólaleitið árið 2013.

Mick var samt ekki með neinn aukvisa sér til aðstoðar því fréttir herma að Sebastian Vettel hafi verið honum til ráðlegginga um helgina. Annar ungur ökumaður tók þátt í kappakstrinum, Harrison Newey, sem er sonur Adrian Newey er hannaði alla sigurbíla Red Bull á þeim árum sem sigurganga þeirra stóð sem hæst. Adrian náði sjöunda sæti fyrsta daginn, þrettánda þann næsta og tuttugasta og sjöunda sæti á lokadeginum.