Veiðin ennþá góð og sjóbirtingurinn vel haldinn

Þrátt fyrir afleitt veður suma daga frá opnun veiðitimabils láta veiðimenn það ekkert á sig fá og árnar hafa verið vel sóttar frá 1. apríl.

Tungulækur hefur gefið fína veiði og hafa veiðimenn sem hafa heimsótt Tungulæk verið sammála um að mikið sé af fiski og hann vænn  með eindæmum.  Heldur rólegra hefur verið í Tungufljóti með dagamun þó en þar hafa líka sést og sloppið ansi vænir sjóbirtingar.  Varmá hefur gefið vel það sem af er tímabili og risableikjurnar á Stöðvarbreiðu toga greinilega marga þangað en þær eru líklega um 30-40 talsins og sjást vel þegar þær velta sér í hylnum.  Þær taka flugurnar ágætlega en eru heldur slappar þegar þær eru teknar inn annað en sjóbirtingurinn í ánni sem tekur væna spretti þegar hann stekkur á agnið.

Einhver vorveiði hefur verið reynd í Ytri Rangá og þar hafa nokkrir vænir sjóbirtingar veiðst og líklega styttist í að veiðin á urriðanum á efri svæðunum fari aftur í gang en þar er hægt að veiða 5-10 punda urriða séu veiðimenn á annað borð að leita sérstaklega að honum.  Húseyjakvísl hefur líka verið að gefa fína veiði og væna birtinga en þar hefur sjóbirtingsveiðin tekið vel við sér eftir að V&S fyrirkomulagið var tekið upp í ánni.  Vífilstaðavatn hefur gefið nokkrar bleikjur og það koma skot af og til.  Veiðimaður sem var þar fyrir fjórum dögum fékk 3 fallegar bleikjur sem voru allar rétt undir kílói að þyngd sem telst nú bara gott í þessu vatni sem er ekki sérstaklega frægt fyrir vænar bleikjur.