Stólarnir náðu ekki meti Snæfells og KR

Tindastóll tapaði í gær sínum fyrsta leik í úrslitakeppninni í ár þegar liðið lá með fjórtán stigum á heimavelli á móti Haukum en fyrir leikinn var liðið eina ósigraða liðið í úrslitakeppni Dominos-deildar karla í körfubolta.

Stólarnir fá tvö tækifæri til viðbótar til að komast í lokaúrslitin en þeir misstu hinsvegar af meti með því að tapa leiknum í gær.

Snæfellsliðið frá 2004 og KR-liðið frá 2009 eru einu liðin sem hafa unnið fyrstu sex leiki sína í úrslitakeppni en með sigri í gær hefði Tindastólsliðið jafnað metið þeirra.

Tindastólsliðið hefði jafnframt orðið fyrsta liðið til að komast taplaust í lokaúrslitin síðan að það þurfti að vinna þrjá leiki í átta liða úrslitunum.

Þetta er annað árið í röð sem liði mistekst að vinna sjötta leikinn í röð eftir að hafa unnið fimm fyrstu leiki sína í úrslitakeppni. KR-ingar kynntust því einnig í fyrra en þeir töpuðu þá á heimavelli í sjötta leik alveg eins og Stólarnir í ár.

Stjarnan vann þá þriðja leikinn í Vesturbænum og minnkaði muninn í 2-1 í undanúrslitaeinvígi liðanna. KR-ingar unnu hinsvegar næsta leik og fóru í lokaúrslitin þar sem þeir tryggðu sér Íslandsmeistaratitilinn.

Nú er að sjá hvort Tindastóll hefur sama háttinn á þegar þeir mæta Haukum á Ásvöllum annað kvöld. Sigur þýðir sæti í lokaúrslitunum á móti annaðhvort KR eða Njarðvík en tap þýðir að liðin mætast í oddaleik á Króknum á föstudagskvöldið.

Besta byrjun í einni úrslitakeppni 1984-2015:

6-0

Snæfell, 2004

KR, 2009  - Íslandsmeistari

5-0

KR, 1990  - Íslandsmeistari

Grindavík, 1997 - 2. sæti

KR, 2014  - Íslandsmeistari

Tindastóll, 2015

4-0

Njarðvík, 1984  - Íslandsmeistari

Njarðvík, 1986  - Íslandsmeistari

Njarðvík, 1987  - Íslandsmeistari

Snæfell, 2008 - 2. sæti

Grindavík, 2009 - 2. sæti

KR, 2011  - Íslandsmeistari

Grindavík, 2012  - Íslandsmeistari

KR, 2015