Þarf Ísland að draga sig úr Eurovision?

Vegna verkfalls lögmanna hjá Sýslumanninum á höfuðborgarsvæðinu eru líkur á því að Ísland geti ekki tekið þátt í Eurovision í ár. Um áraraðir hefur það verið hlutverk lögbókanda hjá Sýslumanninum á höfuðborgarsvæðinu, áður Reykjavík, að fylgjast með og staðfesta niðurstöðu íslensku dómnefndarinnar í Eurovision.

Samkvæmt tilkynningu frá Bandalagi háskólamanna má setja spurningamerki við þátttöku Íslands í söngvakeppninni, dragist verkfallið á langinn.

Hætt á annað þúsund skjöl bíða nú eftir þinglýsingu. Engin þinglýsing fer fram né heldur aflýsing skjala. Þar að auki eru engin ný leyfi gefin út né gildandi leyfi endurnýjuð.

Í tilkynningunni segir að lánastofnanir greiði ekki út lán og að leiða megi líkur að því að leyfi séu að renna út. Þá segir að gera megi ráð fyrir að lögregla muni loka stöðum sem hafi ekki leyfi til reksturs.

Pantaðir tímar hjá lögfræðingum í sifjamálum, lögráðamálum, ættleiðingum og dánarbúsmálum falla niður. Þá er eigi unnt að ljúka neinum málum né stofna ný mál þar sem atbeina lögfræðings er þörf, sem er víða.

Engin fjárnám eða aðrar aðfarargerðir fara fram, svo sem eins og nauðungarsölur, útburðir eða kyrrsetningar.