Fyrsta konan í NFL-deildinni

Næsta tímabil í NFL-deildinni verður sögulegt því þá mun kona sjást á vellinum.

NFL er nefnilega búið að ráða fyrsta kvendómarann. Sarah Thomas mun brjóta blað í sögu deildarinnar næsta vetur er hún verður fyrsta konan á vellinum í þessari hörðu íþrótt.

Thomas byrjaði að dæma í framhaldsskóla en hætti til þess að einbeita sér að ferli sínum sem lyfsali.

Hún fór svo að dæma aftur árið 2007 og varð fyrsta konan til þess að dæma „Skálarleik" í háskólaboltanum árið 2009.

Hún hefur síðan verið á dómaranámskeiðum hjá NFL-deildinni og dæmdi æfingaleiki hjá New Orleans Saints í fyrra sem og æfingaleiki í deildinni.

Thomas lítur ekki á sig sem neinn frumherja.

„Þegar ég fór út í þetta var ég ekkert að velta mér upp úr því að það væru ekki neinar komur í þessu. Ég var í körfuboltakona og þar var ég vön því að konur dæmdu. Mér líður því ekki eins og ég sé einhver frumherji," sagði Thomas.