Manor reynir að velja frumsýningardag

Manor Marussia liðið í Formúlu 1 veltir fyrir sér hvenær nýr bíll liðsins lýtur fyrst dagsins ljós.

Liðið notar nú aðlagaðan bíl frá síðasta tímabili. Enginn tími gafst til að hanna og smíða nýjan bíl eftir að liðið fékk grænt ljós á þátttöku í ár.

Ætlunin hefur alltaf verið að koma með nýjan bíl á tímabilinu. Nýji bíllinn mun notast við hina endurbættu Ferrari vél. Núna notar liðið eldri útgáfu vélarinnar.

„Það er margt sem hefur áhrif á val á nákvæma tímasetningu, þar á meðal sumarfríið þar sem við megum ekkert gera,“ sagi Graeme Lowdon, keppnisstjóri Manor.

Lowdon segir að hugsanleg breyting á vélatakmörkunum úr fjórum vélum í fimm sé einnig stór hluti af ákvörðuninni.

„Það er ekki alveg á hreinu hvert markið er. Það barst í tal í Malasíu að breyta jafnvel fjölda leyfilegra véla á tímabilinu, það hefur áhrif á ákvörðunina,“ sagði Lowdon.

„Það er mikil vinna í gangi hérna í augnablikinu svo við skulum bíða og sjá, en það er ljóst að það bíða okkar miklar framfarir. Það er því eitthvað til að keppa að,“ sagði Lowdon að lokum.