Virkjun heimiluð í friðlýstri laxveiðiá

Ríkisstjórn Noregs hefur veitt heimild til virkjanaframkvæmda í Raundalselva, sem er friðlýst laxveiðiá á Hörðalandi norðaustur af Bergen, milli Sognfjarðar og Harðangursfjarðar. Í frétt á vef NRK, norska ríkisútvarpsins, kemur fram að Vatna- og orkustofnun Noregs hafi lagst gegn því að lítil virkjun, sem þar var fyrir, yrði nífölduð að stærð en olíu- og orkumálaráðuneytið hafi samþykkt framkvæmdirnar.

Virkjunin er við Palmafoss en áformað er að hún verði stækkuð og raforkuframleiðslan aukin úr 1,8 gígavattstundum á ári upp í 16,3 gígavattstundir. Það þýðir að mun stærri hluti af rennsli árinnar verður virkjaður. NRK segir óvenjulegt að ráðuneyti samþykki framkvæmdir sem undirstofnun hafi hafnað.

Umhverfisdeild fylkismannsins á Hörðalandi hafði þó minni efasemdir um virkjunina en Vatna– og orkustofnunin, þrátt fyrir að vatnasviðið væri friðlýst og laxastofn árinnar talinn viðkvæmur. Þar segjast menn sáttir við þær varnir sem orkufyrirtækið Voss Energi hyggst beita til að hindra að laxinn lendi í túrbínum virkjunarinnar. 

Ráðuneytið segir virkjunarleyfið meðal annars byggt á yfirlýsingum bæði Fylkismannsins og Umhverfisstofnunar Noregs um að skilyrði laxastofnsins í ánni muni ekki versna.  Svæðið væri auk þess þegar raskað og minna rennsli á fossinum gæti auðveldað laxagöngur. 

Ný orkulög, sem hin rauðgræna ríkisstjórn Stoltenbergs setti fyrir fjórum árum, um svokölluð græn orkuskírteini, hafa hleypt miklum krafti í virkjanaframkvæmdir í landinu. Þau niðurgreiða endurnýjanlega orkugjafa og samkvæmt úttekt þarlends háskóla í fyrra eru uppi áform um að virkja tuttugu teravattstundir til viðbótar í Noregi á næstu árum. Það er næstum tvöfalt meira vatnsafl en búið er virkja á Íslandi.