Alonso setur sér markmið eftir fyrstu keppni

Fernando Alonso, ökumaður McLaren-Honda segist ekki ætla að setja sér markmið fyrir tímabilið fyrr en hann hefur séð hvað bíllinn getur í alvöru. Hann býst við að það verði í kringum kínverska kappaksturinn.

Alonso segist vera virkilega hrifinn af metnaði Honda fyrir verkefninu og nálgun þeirra og samstarfi við McLaren. Hann heimsótti höfuðstöðvar Honda í Japan á dögunum.

„Ég sá mikið af hæfileikaríku fólki hjá Honda þegar ég heimsótti verksmiðjuna í Sakura. Ég sá allt aðra nálgun samanborið við önnur lið, hér er þetta nálgast með mjög vísindalegum og tæknilegum aðferðum,“ sagði spænksi ökumaðurinn.

„Í þessari nýju Formúlu 1 er mikið af rafmagni og hugbúnaði - það er mikið af samskiptum. Ég held að með tækninni sem Honda beitir og japanskri menningu getum við sett saman einhverja snilld,“ bætti hann við.

Alonso er jákvæður en vill samt ekki setja sér nein markmið fyrr en hann veit hvað bíllinn getur í raun. Hann hefur ekki ekið honum á fullu afli.

„Við viljum ná í titla. Ég veit ekki hvort það verði á fyrsta ári, því öðru eða því þriðja - vonandi sem allra fyrst,“ sagði Alonso að lokum.