Öruggur sigur Frakka - Tékkar löguðu stöðuna í lokin

Frakkar unnu þriggja marka sigur á Tékkum, 30-27, í hinum kvöldleiknum í riðli Íslands. Frakkar voru sjö mörkum yfir í hálfleik og góð tök á leiknum nær allan tímann.

Nikola Karabatic og Michaël Guigou skoruðu báðir sjö mörk fyrir franska liðið og voru markahæstir en Pavel Horak skoraði átta mörk fyrir tékkneska liðið.

Tékkar komust í 1-0 og 2-1 en þá komu fjögur frönsk mörk í röð. Tékkar náðu að jafna aftur í 6-6 en annar frábær sprettur Frakka með fimm mörk í röð skilaði franska liðinu 11-6 forystu. Frakkar voru síðan sjö mörkum yfir í hálfleik, 16-9.

Frakkar voru með öruggt forskot í seinni hálfleiknum og voru sex mörkum yfir, 29-23, þegar sex mínútur voru eftir.

Tékkar skoruðu fjögur af síðustu fimm mörkum leiksins og löguðu aðeins stöðuna en sigur franska liðsins var aldrei í hættu.