Spjalla saman um tækni, heimslist og menningu

„Við vinnum allar við leirinn að staðaldri en sumar eru jafnframt í launavinnu annars staðar. Verkin okkar eru aðallega skúlptúrar og nytjahlutir,“ segir Ingunn Erna Stefánsdóttir, ein þeirra sex kvenna sem eru með opnar vinnustofur um helgina í SÍM-húsinu að Seljavegi 32. Skyldu þær verða með rennibekkina í gangi og leirinn upp að olnbogum?

„Nei, ekki að þessu sinni en við verðum allar á staðnum,“ svarar hún. „Vinnustofurnar verða með öðru yfirbragði en þegar við tökum á móti gestum á Degi myndlistar í byrjun nóvember. Þá mótum við, rennum eða glerjum muni, erum sem sagt í vinnunni.“

Leirlistakonurnar eru Áslaug Höskuldsdóttir, Guðrún Halldórsdóttir, Inga Elín, Ingunn Erna Stefánsdóttir, Ragnheiður Ágústsdóttir og Unnur Sæmundsdóttir. „Við vinnum mjög ólíkt þó við séum með svipaða grunnmenntun.

Tækniaðferðirnar eru mismunandi þó leirinn sé aðalefnið,“ segir Ingunn Erna.

Margir þættir myndlistar skarast í leirvinnslunni að sögn Ingunnar Ernu. Því þykir þeim stöllum gott að vera í SÍM-húsinu og geta deilt kunnáttu sinni og hugmyndum.

„Það er frábært að geta spjallað saman um tækni, heimslistina og menningarmál almennt því í húsinu eru 50 vinnustofur og auk þess gestavinnustofur fyrir erlenda myndlistarmenn og samgangur á milli,“ segir Ingunn Erna.

Í dag verður opið hjá listakonunum milli 16 og 20 og á morgun og sunnudag milli 12 og 16. Reynir Jónasson ætlar að mæta með harmóníkuna klukkan 18 í dag og leika ljúfa tóna.