Endar útivallarmartröð Grindvíkinga í kvöld?

Grindvíkingar hafa komist í fimm af síðustu sex úrslitaleikjum í deild og bikar en byrjun þessa tímabils í Dominos-deild karla hefur reynt á skap manna í Grindavíkinni. Fjögur töp í fyrstu sex leikjunum er eitthvað sem menn eiga ekki að venjast í Grindavík eftir sigursæl ár á undan.

Það eru þó þrjú vandræðaleg töp Grindavíkurliðsins á útivelli sem stinga mest í augu en liðið hefur tapað þremur fyrstu útileikjum tímabilsins með 30 stigum að meðaltali. Varnarleikur Grindavíkurliðsins í þessum leikjum hefur örugglega verið mikil pína fyrir þjálfarann Sverri Þór Sverrisson sem lagði líf og sál sína í varnarleikinn sem leikmaður. Grindvíkingar hafa fengið á sig 106 stig að meðaltali í þessum þremur útileikjum og skotnýting mótherjanna jókst í hverjum leik.

Kanaleysi og meiðsli lykilmanna afsaka kannski töpin en ekki skellina. Nú er svo komið að Grindavíkurliðið þarf að fara að vinna leiki ætli liðið sér að keppa um fjögur efstu sætin inn í úrslitakeppnina.

Grindvíkingar eiga á hættu að missa ÍR-inga upp fyrir sig og að detta niður í 10. sæti deildarinnar takist þeim ekki að enda útivallarmatröð sína í Seljaskólanum í kvöld. ÍR-ingar hafa aðeins unnið einn af sex leikjum sínum en stóðu vel í heimamönnum í Keflavík í síðasta leik þar sem Bandaríkjamaðurinn Trey Hampton lék sinn fyrsta leik.

Grindvíkingar frumsýndu líka nýjan Kana í síðustu umferð en Rodney Alexander varð að sætta sig við tap á heimavelli á móti Njarðvík í fyrsta leik.

Það fara þrír aðrir leikir fram í kvöld. Njarðvík tekur á móti Snæfelli í Ljónagryfjunni, Tindastólsmaðurinn Darrel Lewis fær sína gömlu liðsfélaga úr Keflavík í heimsókn á Krókinn og Stjörnumenn taka á móti Fjölni í Garðabænunum. Tindastólsliðið hefur unnið alla leiki nema einn þegar Stólarnir töpuðu í framlengingu á móti toppliði KR.