Málþing til minningar um Matthías Viðar

„Hugmyndin að málþinginu kom frá Soffíu Auði Birgisdóttur og hún kom henni á framfæri við Bókmennta- og listfræðastofnun HÍ. Við sem þar erum hoppuðum strax upp og sögðum „auðvitað“,“ segir Dagný Kristjánsdóttir prófessor um minningarmálþing um Matthías Viðar Sæmundsson sem hefði orðið sextugur þann 23. júní.

 

„Það eru tíu ár frá því Matthías Viðar dó og enn er hann svo nærverandi,“ heldur Dagný áfram.

„Hann var svo sterkur karakter, örlátur og yndislegur maður. Líka spennandi fræðimaður og það var sárt að missa hann svona ungan.“



Á dagskránni eru níu fyrirlestrar um hin ýmsu málefni en að sögn Dagnýjar sveima þau öll kringum áhugamál og fræðilegar áherslur Matthíasar.

„Hann skrifaði um miðaldirnar, hrylling, gotneskar bókmenntir og geðveiki, svona myrkar hliðar mannlífsins og þingið endurspeglar svolítið hans fræðilegu áherslur.“

Fyrirlestur Dagnýjar nefnist Ástin músanna er köld eins og þær sjálfar. Hún segir titilinn í anda Matthásar sem hafi átt til að búa til mjög fríkaða fyrirlestra- og greinatitla.

„Það sem ég er að tala um er ungur maður og músan hans, efnið er sótt í Mánastein eftir Sjón og spænsku veikina,“ útskýrir hún.

Málþingið verður í fyrirlestrarsal Þjóðminjasafns Íslands og stendur yfir frá klukkan 10 til 16.30.

Fyrrilestarnir verða í þessari röð en tekið skal fram að tekið er bæði matar og kaffihlé:

Bergljót Soffía Kristjánsdóttir: „Hleyptu af / eins og fara gerir“. Um eitt ljóða Sigfúsar Daðasonar, íróníu, samfélag, sögu og tilvist“.

Hermann Stefánsson: „Spegill melankólíunnar: Um argentínska skáldið Alejöndru Pizarnik“

Sveinn Yngvi Egilsson: „Svarti engillinn: Depurð og sköpun á 17. öld“

Dagný Kristjánsdóttir: „Ástin músanna er köld eins og þær sjálfar“

Þröstur Helgason: „Thor og Dieter. Módernísk(t) umbrot“

Birna Bjarnadóttir: „Könnunarleiðangur á töfrafjalli – brot úr skýrslu“

Soffía Auður Birgisdóttir: „Flakk: Um sjálfstjáningu Þórbergs Þórðarsonar“



Guðmundur Sæmundsson: „Er leikin knattspyrna á himnum? Um tengsl íþrótta og trúar“



Ármann Jakobsson: „Skrímslin fara á kreik um leið og skynsemin sofnar: Táningspiltur sér gandreið“