Farnir út að sigra í Eurovision

„Vitið þið hvað? Þetta eru síðustu tónleikarnir okkar áður en við fljúgum til Danmerkur til að sigra í Eurovision,“ sagði Heiðar Örn Kristjánsson, gítarleikari og söngvari í Pollapönki, við unga aðdáendur á tónleikum sem haldnir voru fyrir börn á Fróni á Selfossi á laugardag.

Sveitin, ásamt fylgiliði, þar á meðal Óttari Proppé, tónlistarmanni og þingmanni, flaug út aðfaranótt sunnudags. Snæbjörn Ragnarsson Skálmaldarmaður, sem líka leggur Pollapönkurum lið í bakröddum, var á tónleikaferðalagi og hittir félaga sína í Kaupmannahöfn. Keppnin fer fram 6., 8. og 10. maí næstkomandi.