KR-ingar sterkari en Keflvíkingar í þremur stöðum

Þeir gerast varla stærri leikirnir í deildarkeppni Dominos-deildarinnar en leikur toppliða KR og Keflavíkur í DHL-höllinni í kvöld.

Liðin eru jöfn að stigum á toppnum og hafa aðeins tapað einum leik af sautján. Þetta er án vafa óopinber úrslitaleikur um deildarmeistaratitilinn.

KR-ingar unnu ellefu stiga sigur í fyrri leik liðanna í Keflavík og Keflavíkurliðið hefur síðan unnið tíu deildarleiki í röð. KR-ingar töpuðu fyrsta leik ársins 2014 en hafa síðan unnið fimm leiki í röð.

Þeir tefla nú fram nýjum Kana frá því í fyrri leiknum en Demond Watt Jr. hjálpaði liðinu að vinna góðan sigur í Njarðvík á dögunum.

Fréttablaðið fékk þá Inga Þór Steinþórsson (þjálfara Snæfells), Benedikt Guðmundsson (þjálfara Þórs Þorl.) og Ívar Ásgrímsson (þjálfara Hauka) til að meta hvort liðið væri með betri menn í leikstöðunum fimm og hvort liðið sé með betri bekk.

Samkvæmt því ættu KR-ingar að vinna leikinn í kvöld en lærisveinar Andy Johnston hafa nú endurheimt stórskyttuna Magnús Þór Gunnarsson frá því í fyrri leiknum en Magnús missti af þeim leik vegna meiðsla.

Þar ættu Keflvíkingar að fá einhver stig af bekknum en Keflavík fékk 18 færri stig af bekknum en KR í fyrri leik liðanna (5-23).

Það má í raun segja að í kvöld sé fyrsti í úrslitakeppni fyrir lið KR og Keflavíkur enda gæti heimavallarréttur í lokaúrslitunum ráðið miklu fyrir útkomuna í vor.

Leikurinn hefst klukkan 19.15 og er í beinni á Stöð 2 Sport.