Jafntefli í Baskaslag

Real Sociedad og Athletic Bilbao skildu jöfn, 1-1, í Baskaslag í spænsku úrvalsdeildinni í kvöld.

Sociedad náði forystunni með marki Carlos Vela strax á 3. mínútu, en Óscar De Marcos jafnaði metin eftir rúmlega klukkutíma leik. Bilbao lék manni færri síðustu tíu mínútur leiksins eftir að Aymeric Laporte fékk að líta sitt annað gula spjald.

Alfreð Finnbogason var í byrjunarliði Sociedad og lék allan leikinn. Íslenski landsliðsframherjinn átti fjögur skot að marki sem öll geiguðu, en hann bíður enn eftir sínu fyrsta marki fyrir Sociedad.

Lærisveinar Davids Moyes eru í 14. sæti með 14 stig, en Athletic Bilbao er í því 10. með 19 stig.