Cosby ekki ákærður

Bandaríski gamanleikarinn Bill Cosby, sem sakaður hefur verið um að hafa misnotað 15 ára stúlku árið 1974, verður ekki ákærður. Bandarísk dómsmálayfirvöld komust að þessari niðurstöðu í dag og segja brotið fyrnt.

Yfir tuttugu konur hafa borið á Cosby ásakanir um kynferðislega áreitni, en Judy Huth er sú fyrsta sem hefur farið með málið fyrir dómstóla. Hún sakar hann um að hafa nauðgað sér og byrlað sér ólyfjan á Playboy-setrinu svokallaða árið 1974 þegar hún var einungis fimmtán ára gömul.  Cosby segir ásakanirnar þó með öllu tilhæfulausar.