Sveppahjúpað hátíðarhreindýr

Margir eru með hreindýrakjöt á hátíðarborðinu. Hér Eyþór Rúnarsson, sjónvarpskokkur er með frábæra uppskrift af hreindýralund sem hjúpuð er sveppum, kremaðri sveppasósu og graskers-,peru- og gráðaostasalati

Hreindýravöðvi  í sveppahjúp

800 gr fullhreinsaður hreindýravöðvi

2 box sveppir (smátt skornir )

5 stk skallotlaukur (skrældur og smátt skorinn)

1 hvítlauksrif (fínt rifið)

4 msk brauðraspur

1 poki spínat

Ólífuolía til steikingar

Svartur pipar úr kvörn

Sjávarsalt  

Hitið pönnu með olíu á og steikið sveppina í 3 mín, bætið lauknum út á pönnuna og steikið þar til laukurinn og sveppirnir eru orðnir gullin brúnir. Steikið spínatið upp úr ólífuolíunni, setjið það á skurðarbretti og skerið það niður.  Setjið laukinn, sveppina og spínatið í skál með hvítlauknum og brauðraspnum. Smakkið til með saltinu og piparnum.

Hitið pönnu með olíu og brúnið hreindýrið allan hringinn í ca. 30 sek á  hvorri  hlið setjið í eldfast mót og hjúpið filleið með hjúpnum. Setjið inn í 180 gráðu heitan ofninn í 13 mín. Takið út og setjið bakka yfir og látið hvíla í 10 mín. Gott er að kjötið nái 52-54 gráðum í kjarnhita.

Kremuð sveppasósa

1 stk hvítur laukur

2   hvítlauksrif

Olía til steikingar

100 ml hvítvín (má sleppa)

200 gr blandaðir frosnir villisveppir

½ líter rjómi

150 ml kjúklingasoð eða vatn og kraftur

Safi úr 1 stk lime

Sjávarsalt

Svartur pipar úr kvörn

Kjúklingakraftur

Skrælið og skerið laukinn og hvítlaukinn í þunnar skífur. Steikið laukinn við lágan hita þar til hann er orðinn mjúkur í gegn. Hellið hvítvíninu yfir laukinn og sjóðið það niður um helming. Hellið soðinu (eða vatninu) og rjómanum í pottinn og sjóðið við lágan hita í ca 30 mín eða þar til að sósan fer að þykkna. Maukið sósuna með töfrasprota. Smakkið hana til með lime safanum salti, pipar og kjúklingakraftinum eftir smekk.

Graskers-, peru- og gráðostasalat

 400 gr grasker skorið í kubba

1 stk rauðlaukur gróft skorinn

1 msk rauðvínsedik

1 msk sykur

1 stk fullþroskuð pera

4 msk ristaðar pekanhnetur  (5 mín 180 gráður)

20 steinlaus vínber

2 msk gráðostur

1 msk sýrður rjómi

ólífuolía

sjávarsalt

svartur pipar

Bakið graskerið við 180 gráðu hita í 30 mín og kælið það niður. Setjið rauðlaukinn í eldfast mót.  Veltið honum upp úr edikinu, sykrinum, saltið og piprið og bakið í 10 mín við 180 gráður. Skerið peruna og vínberin niður og setjið í skál með rauðlauknum og graskerinu. Blandið hnetunum út í ásamt sýrða rjómanum og gráðostinum og smakkið til með salti og pipar.