Massa væntir þess að vera í titilbaráttunni 2015

Felipe Massa annar ökumana Williams liðsins í Formúlu 1 stefnir á baráttu um heimsmeistaratitil ökumanna á næsta tímabili.

Massa varð annar í lokakeppni tímabilsins í Abú Dabí rétt á eftir heimsmeistaranum Lewis Hamilton. Williams bíllinn er að öllum líkindum annar hraðasti bíllinn eins og staðan er núna.

„Ég er ánægður með seinnihluta tímabilsins og afar spenntur fyrir næsta ári. Tímabilið byrjaði ekki eins og við vildum en við enduðum með afar samkeppnishæfan bíl,“ sagði Massa.

„Við getum gert enn betur á næsta ári, betri bíll og við munum koma til að berjast um sigra. Væntingarnar eru miklar. Reglurnar eru ekki að breytast mikið og því ættu sömu lið að vera með samkeppnishæfa bíla á næsta ári og voru í baráttunni í ár. En það er þó alltaf nýr bíll, nýtt ár,“ sagði hann að lokum.

Það verður ekki hlaupið að því að ná Mercedes á næsta ári eftir allt þá höfðu Mercedes bílarnir mikið forskot. Massa hefur trú á að metnaðar fullt starf á milli tímabila geti skilað miklu á næsta ári.