Byrjað að hvessa á suðvesturhorninu

Farið er að hvessa á suðvesturhorni landsins en búist er við að stormur gangi yfir landið í dag og í nótt. Óli Þór Árnason, veðurfræðingur hjá Veðurstofu Íslands, segir suðaustanáttin sé vaxandi og víða sé farið að rigna.

„Fljótlega upp úr hádegi má reikna með hérna suðvestan til á landinu verði kominn stormur með rigningu, talsverðri rigningu, sumstaðar hérna sunnanlands. Það hvessir síðan bara um meira og minna allt land það sem eftir lifir dags og stormurinn verður hér við líði suðvestan til fram undir fimm til sex en þá byrjar hann að snúa sér til suðurs og síðan til suðvestanáttar og fljótlega upp úr kvöldmat verður líklega kominn hérna suðvestanstormur eða rok. Þannig að þá má búast við að vindhraðinn geti orðið allt að 30 metrar á sekúndu þar sem hann nær sér hvað best á strik,“ segir Óli Þór.

Hann segir að það kólni eftir því sem líður á daginn. Vindhviðurnar verða hvað verstar á Ströndum og á Norðurlandi. Hann segir ekkert ferðaveður vera í dag og að mikilvægt sé að fólk hugi að lausum munum til að koma í veg fyrir tjón.

Óli segir þessa haustlæg vera með þeim sterkari sem komið hafi síðustu ár. „ Þessi er alveg í sterkari kantinum. Hún nær kannski ekki alveg að mæla sig alveg upp við 1991 lægðina sem olli nú töluverðu tjóni hérna, sérstaklega hérna suðvestan til, en hún er samt sem áður, hún er mjög öflug þessi. Þannig það er virkilega æskilegt að fólk hafi allan vara á sér,“ segir Óli Þór.