Sálfræðingurinn og núvitundarkennarinn Pálína Erna Ásgeirsdóttir hefur hellt sér út í núvitundarfræði á síðustu árum og hlotið kennaraþjálfun í Mindfulness Based Stress Reduction (MBSR) hjá Jon Kabat-Zinn, upphafsmanni „mindfulness“. Chade-Meng Tan hefur hlotið sömu þjálfun. Pálína las bókina hans á ensku og fagnar útkomu hennar á íslensku.

„Þetta er auðlesin og skemmtileg bók, full af húmor og manngæsku. Hún kemur kjarnanum vel til skila og sýnir hvernig hægt er að laga fræðin að hinum ýmsu aðstæðum.“
En hvað er núvitund? „Ég hef notað skilgreiningu Jon Kabat-Zinn og held að flestir aðhyllist hana. Hún er á þessa leið: „Núvitund snýst um að vera meðvitaður á sérstakan hátt um það sem er að gerast á meðan það er að gerast, án þess að dæma það.“ Pálína segir þörf á öllum þessum orðum til að útskýra hugtakið. „Það er meðal annars ástæðan fyrir því hvað það hefur verið erfitt að sameinast um eitt orð. Hér á Íslandi hefur verið notast við gjörhygli, árvekni, vakandi athygli og vakandi hug. Ég held þó að flestir séu að reyna að hópa sig um Núvitund.“
Núvitundarmiðuð meðferð
Pálína segir núvitundarfræðina góða viðbót við sálfræðina. „Ég hef að hluta til notað núvitundarmiðaða meðferð. Mér finnst hún gagnast þeim sem eru að takast á við krísur og andlegan vanda. Þá er mikilvægt að vera svolítið meðvitaður um hvað er að gerast á meðan það er að gerast til að geta brugðist öðruvísi við en út frá gamla vananum,” útskýrir Pálína.
Bætt lífsgæði og einbeiting
Pálína segir aðferðina líka spennandi fyrir fólk sem vill auka lífsgæði sín, bæta einbeitingu og njóta ferðarinnar í gegnum lífið. „Ég tala nú ekki um á okkar tímum þegar flestir upplifa aukið áreiti samfara notkun á hinum ýmsu snjalltækjum. Við erum alltaf í einhvers konar samskiptum og þá er auðvelt að týna sjálfum sér.“ Pálína segir að sýnt hafi verið fram á að núvitundaræfingar dragi úr streitu og geti minnkað kvíða og depurð. „Líf mitt hefur breyst mikið eftir að ég tileinkaði mér núvitund. Ég var streitubolti en geri bæði formlegar og óformlegar núvitundaræfingar á hverjum degi og líki lífinu fyrir og eftir ekki saman.”
Sálfræðingurinn Margrét Arnljótsdóttir skrifar formála í bókina, en hún hefur haldið fjölmörg námskeið um núvitund hér á landi. Hún er í Alúð, félagi um núvitund og vakandi athygli, sem um helgina heldur námstefnu um hugrækt og núvitund á Heilsustofnun NLFÍ í Hveragerði. Á námstefnunni verður meðal annars fjallað um bók Chade-Meng Tan og notkun núvitundar í íslensku atvinnulífi, heilbrigðiskerfi, skólum og fangelsum svo dæmi séu nefnd.