Brady hafði betur gegn Manning

Fátt virðist geta stöðvað Tom Brady og félaga hans í New England Patriots í NFL-deildinni en í nótt hafði liðið betur gegn meistaraefnunum í Denver Broncos á heimavelli, 43-21.

Ættjarðarvinirnir gerðu snemma út um leikinn en eftir að Broncos skoraði fyrsta snertimarkið í leiknum komu 24 stig í röð frá New England.

Margir eru á þeirri skoðun að Payton Manning, hinn magnaði leikstjórnandi Broncos, eigi erfitt uppdráttar í köldu veðri en hann kastaði engu að síður yfir 400 jarda í leiknum og fyrir tveimur snertimörkum. Hann kastaði þó boltanum einnig tvisvar í hendur andstæðingsins.

Brady var með 333 sendingajarda í leiknum og hefur nú unnið ellefu af sextán viðureignum sínum gegn Manning.

Sigurhlutfall Patriots er nú 7-2 og liðið hefur unnið fimm leiki í röð. Brady hefur verið algjörlega magnaður á þessum kafla eftir að hann fór rólega af stað í byrjun tímabilsins. Broncos stendur í 6-2 en bæði lið leika í AFC-deildinni.

Aðeins eitt lið er með betra sigurhlutfall en Patriots en það er Arizona Cardinals (7-1) sem vann Dallas Cowboys, 28-17. Dallas er eitt af betri liðum deildarinnar en saknaði leikstjórnandans Tony Romo sárlega en hann er frá vegna bakmeiðsla.

Það var að auki margt um að vera að venju í deildinni en spennan var hvergi meiri en í San Francisco þar sem St. Louis Rams hafði betur gegn heimamönnum, 13-10. 49ers fékk þó tækifæri til að tryggja sigurinn á lokasekúndunni en leikstjórnandinn Colin Kaepernick tapaði boltanum við endalínuna á dramatískan máta.

Pittsburgh vann svo í nótt sannfærandi sigur á Baltimore, 43-23, þar sem leikstjórnandinn Ben Roethlisberger varð fyrsti maðurinn í sögunni til að gefa sex snertimarkssendingar í tveimur leikjum í röð. Hann hafði fyrir síðasta leik gefið tíu snertimarkssendingar allt tímabilið.

Meistararnir í Seattle Seahawks ráku svo af sér slyðruorðið með 30-24 sigri á Oakland og eru nú 5-3 á leiktíðinni eftir tvo sigra í röð. Oakland er eina liðið í deildinni sem hefur tapað öllum leikjum sínum til þessa.

Úrslit gærdagsins:

Cleveland - Tampa Bay 22-17

Dallas - Arizona 17-28

Houston - Philadelphia 21-31

Kansas City - NY Jets 24-10

Cincinnati - Jacksonville 33-23

Miami - San Diego 37-0

Minnesota - Washington 29-26

San Francisco - St. Louis 10-13

New England - Denver 43-21

Seattle - Oakland 30-24

Pittsburgh - Baltimore 43-23

Staðan:

AFC austur:

New England 7-2

Buffalo 5-3

Miami 5-3

NY Jets 1-8

AFC norður:

Cincinnati 5-2-1

Pittsburgh 6-3

Cleveland 5-3

Baltimore 5-4

AFC suður:

Indianapolis 5-3

Houston 4-5

Tennessee 2-6

Jacksonville 1-8

AFC vestur:

Denver 6-2

Kansas City 5-3

San Diego 5-4

Oakland 0-8

NFC austur:

Philadelphia 6-2

Dallas 6-3

NY Giants 3-4

Washington 3-6

NFC norður:

Detroit 6-2

Green Bay 5-3

Minnesota 4-5

Chicago 3-5

NFC suður:

New Orleans 4-4

Carolina 3-5-1

Atlanta 2-6

Tampa Bay 1-7

NFC vestur:

Arizona 7-1

Seattle 5-3

San Francisco 4-4

St. Louis 3-5