Ertu að tapa þér?

Núvitund hefur verið mikið til umræðu undanfarna mánuði og sífellt fleiri sem kynna sér kenningar Mindfulness, eins og það heitir upp á ensku. Núvitund snýst fyrst og fremst um, eins og orðið gefur til kynna, að vera í núinu, staldra við og vera. Það eru til margar og mismunandi leiðir að þessu ástandi og ekki allir sem geta gefið sér tíma til að staldra við reglulega yfir daginn og hugleiða. Það að ná núvitundarástandi tekur tíma að verða að vana en einhversstaðar þarf að byrja.

Gott getur verið að nýta morgnana í örstutta hugleiðslu, þó að það sé ekki nema til þess að vera meðvituð um öndun og fylla líkamann af jákvæðum og uppbyggilegum hugsunum. Yfir daginn geturðu svo gert þessar þrjár skyndihugleiðslur sem færa þig aftur í núvitundarástand.



Fylgstu með

Næst þegar þú ert algjörlega að tapa þér og blóðþrýstingurinn kominn upp úr öllu valdi ímyndaðu þér þá að þú sért að horfa á þig á bíóskjá. Með því að færa sjálfið út úr aðstæðunum og horfa á þær sem áhorfandi áður en að þú tekur ákvörðun um næsta skref. Þessi aðferð færir þér aðra sýn á verkefni dagsins og þú tekur meðvitaða ákvörðun um framhaldið. 

Lifðu þig inn í verkefnið

Vertu í núinu, sama hvað þú ert að gera. Jafnvel þegar þú ert að vaska upp. Finndu fyrir volgu vatninu, sjáðu sápuna freyða. Fylgstu með því sem er að gerast akkurat núna. Hvernig líður þér? Finnurðu fyrir hjartanu, ertu að anda djúpt og reglulega eða ótt og títt?

Dragðu andann

Enn og aftur þegar stressið og streitan gerir vart við sig og þú átt eftir að gera það mikið að þú sérð ekki fram úr "to do" listanum. Andaðu, dragðu djúpt andann og hugsaðu „Ég er," andaðu frá þér og hugsaðu „friður". „Ég er friður."