Microsoft segir upp 1.050 í Finnlandi

Bandaríski hugbúnaðarrisinn Microsoft tilkynnti í morgun að samráðsfundum með fulltrúum atvinnurekanda í Finnlandi væri lokið og staðfesti jafnframt að allt að 1.050 starfsmönnum fyrirtækisins yrði sagt upp í landinu.

Microsoft keypti finnska fjarskiptafyrirtækið Nokia í vor og voru um 25 þúsund fyrrum starfsmenn Nokia sem gengu þá til liðs við Microsoft.

Í frétt YLE segir að tilkynnt hafi verið að til standi að leggja niður rannsóknar- og þróunardeild fyrirtækisins í Oulu í norðvesturhluta landsins, þar sem um fimm hundruð manns eru við störf.

Microsoft tilkynnti fyrr í sumar að allt að 18 þúsund starfsmönnum yrði sagt upp næsta árið. Uppsagnirnar eru þær mestu í 39 ára sögu fyrirtækisins. Flestir þeirra sem verður sagt upp, eða um 12.500, unnu áður hjá símafyrirtækinu Nokia.

Alls starfa um 127 þúsund manns hjá fyrirtækinu víðs vegar um heim.