Adam Haukur skoraði tíu mörk á móti Íslandsmeisturunum

Adam Haukur Baumruk átti frábæran leik í kvöld þegar Haukar unnu 30-25 sigur á Íslandsmeisturum ÍBV í fyrri leik kvöldsins í Hafnarfjarðarmótinu í handbolta sem er árlegt æfingamót sem fer alltaf fram í Strandgötu í Hafnarfirði.

Adam Haukur skoraði 10 mörk í leiknum en Haukar snéru leiknum við í seinni hálfleik. Eyjamenn voru 16-13 yfir í hálfleik en Haukarnir unnu seinni hálfleikinn með átta mark mun, 17-9.

Árni Steinn Steinþórsson skoraði 6 mörk fyrir Hauka og Leonard Harðarson var með fjögur mörk.

Theodór Sigurbjörnsson skoraði tíu mörk fyrir ÍBV-liðið og þeir Einar Sverrisson og Grétar Þór Eyþórsson voru báðir með fjögur mörk.

Haukar hafa þar með unnið tvo fyrstu leiki sína á mótinu. FH tekur á móti Akureyri í seinni leik kvöldsins og vinni FH-ingar leikinn mætast Hafnarfjarðarliðin í hreinum úrslitaleik á morgun.