Frábært snertimark í fyrsta leik | Myndband

Undirbúningstímabilið í NFL-deildinni í amerískum fótbolta hefst formlega um næstu helgi, en venju samkvæmt fór fyrsti leikurinn fram í Ohio á sunnudaginn eftir inntöku 2014-árgangsins inn í frægðarhöllina.

Að þessu sinni mættust New York Giants og Buffalo Bills í þessum fyrsta leik hvers tímabils, og hafði mikið breytt New York-lið sigur á annars nokkuð spennandi Buffalo-liði, 17-13.

Eli Manning, leikstjórnandi Giants, spilaði fyrstu mínúturnar og kláraði sex sendingar af sjö áður en boltinn var sleginn úr höndum hans af varnarmanni Bills. Þar með lauk þátttöku Eli í leiknum.

Bills komst yfir, 13-10, með fallegri fimmtán kerfa sókn fyrir allan völlinn í öðrum leikhluta og vallarmarki í þeim þriðja, en það var nýliðinn CoreyWashington, útherji sem kom frá Newberry-háskólanum í nýliðavalinu, sem tryggði New York sigurinn þegar 13 mínútur voru til leiksloka.

Ryan Nassib, varaleikstjórnandi Giants sem það fékk í nýliðavalinu í fyrra, kastaði boltanum 73 jarda eða 66 metra og Washington greip hann glæsilega fyrir ofan höfuðið á varnarmanni Bills, sneri sér við og hljóp með boltann í endamarkið.

Hér má sjá þetta glæsilega snertimark, en þetta var eina sendingin sem Washington greip í leiknum.