Williams vill fara að vinna keppnir

Frammistöðustjóri Williams liðsins, Rob Smedley segir að liðið eigi að stefna á að vinna í næstu tvem keppnum. Smedley vill meina að Mercedes liðið eigi ekki að vera fyrirstaða á næstu brautum.

Vallteri Bottas náði öðru sæti í breksa kappakstrinum og endurtók svo leikinn í þeim þýska. Finninn hafði þegar náð þriðja sæti í austurrísku keppninni. Hann er í fjórða sæti í heimsmeistarakeppni ökumanna en Williams er einnig í fjórða sæti í keppni bílasmiða. 

Belgíski kappaksturinn er næstur á keppnisdagatalinu. Hann fer fram 24. ágúst. Þar á eftir kemur ítalski kappaksturinn sem fer fram 7. september.

„Það er mögulegt,“ sagði Smedley aðspurður hvort Williams gæti unnið umræddar keppnir.

Báðar brautirnar henta vel bílum með mikinn hámarkshraða. Fá lið hafa getað keppt við Williams í hraða á tímabilinu. Meira að segja Mercedes hefur ekki haft svör við hraða Williams bílanna.

„Báðar þessar brautir henta okkar bíl vel, að ég tel. Það er aðallega vegna þess að þær eru mjög hraðar, hvert hestafl sem þú hefur fram yfir aðra er meira virði þar en annarsstaðar, loftflæðið er líka mikilvægt, sérstaklega á Spa (brautin í Belgíu),“ sagði Smedley sem vill fara að sjá sigurhugarfar innan liðsins.

„Eins og ég hef oft sagt, markmið liðsins er að verða heimsmeistari, til að gera það þarf það að vinna alla. Ég held það viti allir að heimsmeistarakeppnin er frekar einsleit í ár, en það stöðvar okkur ekki í að undirbúa yfirráð á komandi árum,“ sagði Smedley.