Heita því að fljúga áfram með Malaysia Airlines

Fjöldi fólks hefur heitið því að fljúga áfram með flugfélaginu Malaysia Airlines á Facebook-síðu flugfélagsins.

Flugfélagið á í miklum vandræðum eftir að MH17 var skotin niður í austurhluta Úkraínu á fimmtudaginn og MH370 hvarf af ratsjám þann 8. mars síðastliðinn.

Í frétt Independent segir að þessir notendur Facebook hafa lýst yfir stuðningi við flugfélagið og segjast áfram ætla fljúga með félaginu. Ekki hafi verið nokkur leið fyrir félagið að sjá fyrir þennan skelfilega atburð.

298 fórust þegar MH17 var skotin niður en 227 farþegar og tólf áhafnarmeðlimir MH370 eru taldir af eftir að vélin hvarf af ratsjám.

Þó að atburðirnir séu ótengdir er ekki hægt að finna fordæmi þess að sama félag hafi misst tvær vélar með svo skömmu millibili.

Forsvarsmenn fyrirtækisins gera sér grein fyrir að margir vilja síður fljúga með félaginu og hefur því boðist til að endurgreiða fólki pöntuð flugför á þessu ári. Allir sem vilja gera breytingar á ferðaáætlunum sínum verða þó að gera breytingarnar fyrir fimmtudaginn næstkomandi.