Greiðir 190 milljónir dala til fórnarlamba kvensjúkdómalæknis

Forstöðumenn John Hopkins sjúkrahússins í Baltimore hafa samþykkt að greiða 190 milljónir dala, sem svarar til rúmlega 21 milljarðs króna, til allt að 8500 sjúklinga sem skrifuðu undir hópmálsókn á hendur kvensjúkdómalækni sem starfaði á spítalanum.

Læknirinn sem um ræðir, Dr. Nikita Levy, hafði tekið myndbönd af heimsóknum sjúklinganna án þeirrar vitundar og jafnvel framkvæmt óþarfa grindarholsskoðanir.

Levy fyrirfór sér eftir að lögreglan komst á snoðir um málið í fyrra. Á heimili læknisins fannst fjöldinn allur af myndböndum og ljósmyndum af sjúklingum hans sem Levy hafði fangað á myndavélar sem komið hafði verið fyrir á alls kyns hlutum – til að mynda á venjulegum pennum.

„Eftir að skjólstæðingar okkar fréttu af hegðun Dr. Levys urðu þeir örvinglaðir. Þeim fannst þeir sviknir og trúnaðarbresturinn var algjör. Nú, í kjölfar samkomulagsins, geta sár samfélagsins gróið,“sagði Jonathan Schochor, lögmaður sóknaraðila, í samtali við þarlenda fjölmiðla í dag.

Það var samstarfsaðili Levys sem tilkynnti fyrst um hegðun hans við öryggisdeild Hopkins-sjúkrahússins í febrúar í fyrra. Kvensjúkdómalækninum var sagt upp þann 8. febrúar þegar lögreglan tók mál hans til rannsóknar. Á heimili hans fundust átta faldar myndavélar, þar af sex í pennum ásamt því að fjórar tölvur og utanáliggjandi harðir diskar voru gerðir upptækir. Nikita Levy fannst látinn þann 18. febrúar með poka yfir höfði sér og afsökunarbeiðni til konu sinnar.