Rodriguez búinn í læknisskoðun

Spænskir fjölmiðlar fullyrða að James Rodriguez verði kynntur sem leikmaður Real Madrid síðar í dag.

Real kaupir þennan 23 ára Kólumbíumann frá Monaco í Frakklandi fyrir 80 milljónir evra, eða um 12,3 milljarða króna, samkvæmt fjölmiðlum ytra.

Hann gekkst undir læknisskoðun í morgun og sagði að henni lokinni að hann væri afar hamingjusamur. „Allt gekk vel,“ sagði hann. Talið er að hann muni nú skrifa undir sex ára samning og að hann fái treyju númer tíu hjá félaginu.

Stutt er síðan að Real Madrid keypti Toni Kroos frá Bayern München fyrir 25 milljónir evra.