Tuttugu féllu í loftárásum Ísraela í nótt

Ísraelski herinn hélt áfram loftárásum sínum á Gaza í nótt og er talið að allt að tuttugu manns hafi fallið í þeim árásum og tugir særst.

Öryggisráð Sameinuðu þjóðanna hefur verið kallað saman vegna ástandsins, en óttast er að stríð brjótist út ef ekkert verður að gert. Eftir árásirnar í nótt er tala fallina kominn upp tæplega sextíu en stór hluti þeirra eru óbreyttir borgarar og þá hafa konur og börn fallið í valinn. Ísraelsher segist beina eldflaugum sínum að hernaðarlega mikilvægum stöðum en engu að síður hefur fjöldi heimila orðið fyrir flugskeytum.

Benjamin Netanyahu forsætisráðherra Ísraels boðaði hertar árásir á Gaza í gær og sagði að þeim lyki ekki fyrr en Hamasliðar létu af eldflaugaárásum sínum á suðurhluta Ísraels, en enginn hefur fallið vegna þeirra og ísraelskum hermönnum hefur tekist að skjóta margar þeirra niður áður en þær náðu að lenda og valda tjóni.