Stjarnan gæti farið til Póllands og FH til Aserbaídjan

Takist Stjörnunni að vinna einvígi sitt gegn Motherwell í annarri umferð forkeppni Evrópudeildarinnar í knattspyrnu mætir liðið annaðhvort Nömme Kalju frá Eistlandi eða Lech Poznan frá Póllandi í þriðju umferð.

Dregið var til þriðju umferðar í dag, en Stjarnan gerði 2-2 jafntefli við skoska liðið Motherwell í gærkvöldi og mætast liðin öðru sinni á Samsung-vellinum í næstu viku.

Nömme Kalju, sem vann Fram samanlagt, 3-2, í fyrstu umferð forkeppninnar gerði sér lítið fyrir og vann Lech Poznan, 1-0, í fyrri leik liðanna. Poznan er þó talið mun sterkara lið og verður að teljast líklegur mótherji Stjörnunnar komist Garðbæingar áfram.

Stjarnan var með spennandi mótherjum á borð við Hull City Tigers, PSV Eindhoven og Tórínó í potti.

FH heldur væntanlega áfram að ferðast um austur-Evrópu ef það klárar einvígi sitt gegn hvítrússneska liðinu Neman Grodno. Liðin skildu jöfn, 1-1, í Hvíta-Rússlandi í gær.

FH mætir siguvegaranum úr viðureign Elfsborg frá Svíþjóð og Inter Bakú frá Aserbaídjan í næstu umferð, en Inter vann fyrri leikinn á útivelli, 1-0.