Forbes selt til Kína

Forsvarsmenn fjölmiðlaveldisins Forbes Media hafa tilkynnt að meirihluti fyrirtækisins hefur verið seldur til hóps af alþjóðlegum fjárfestum í Hong Kong. Þetta kemur fram í bloggfærsluSteve Forbes sem birt var í gær.

Forbes hefur verið í eigu sömu fjölskyldunnar í 97 ár en hún segist enn munu eiga mikilvægan hlut í félaginu.

Steve Forbes mun halda áfram sem stjórnarformaður og aðalritstjóri. „Þrátt fyrir að þessi dagur sé vendipunktur hjá þessu 97 ára félagi sem afi minn stofnaði, á að líta á hann sem tækifæri til að halda áfram og styrkja okkur,“ segir Forbes í bloggfærslunni.

Forbes, sem nær til 75 milljón manna um allan heim mánaðarlega í gegnum alla miðla sína byrjaði að leita að fjárfestum í nóvember. Kaupverðið er ekki gefið upp.

Höfuðstöðvar félagsins verða áfram í Bandaríkjunum.