Jöfn veiði í Norðurá og Blöndu

Samkvæmt tölum frá Landssambandi Veiðifélaga frá því á miðvikudaginn er veiðin í Norðurá og Blöndu mjög jöfn.

Norðurá var í 37 löxum en Blanda í 34 en þessar tölur eru síðan á miðvikudag og báðar árnar eru komnar yfir 50 laxa í dag.  Það sem aftur á móti skekkir niðurstöðuna er að það er aðeins veitt á 4 stangir í Blöndu en 8 stangir eins og er í Norðurá og þeim á eftir að fjölga í báðum ánum þegar lengra líður inná tímabilið.  Mesta veiðin í Blöndu er á svæði I en þegar áin helst tær langt inní ágúst eða september er veiðin oft feykilega góð á svæðum III og IV.  Minna er þó veitt á svæði II en það er langt og veiðistaðir þar margir en engu að síður er veiðivon þar góð.  Norðurá hefur lengi verið þekkt fyrir gríðarlegar sterkar smálaxagöngur þegar líður á júní og er óhætt að segja að þegar þær hella sér inn í ánna verða hyljir hennar bláir af laxi.  Þar sem það er svo stutt liðið á tímabilið er erfitt að spá nokkru fyrir um framhaldið en ástand laxsins úr sjó veit þó á gott varðandi framhaldið.