McLaren stefnir á að loka bilinu

McLaren liðið er sannfært um að það sitji á uppfærslum sem dugi því til að keppa við fremstu lið strax í næstu keppni.

Liðið hefur unnið hörðum höndum að því að búa til þá hluti sem þarf til að uppfærslan gangi upp. Um er að ræða tvíþætta uppfærslu. Fyrra skrefið verður tekið fyrir austurríska kappaksturinn næstu helgi. Seinna skrefið verður svo tekið fyrir breska kappasturinn sem fer fram á Silverstone brautinni 6. júlí.

Uppfærslan inniheldur heildstæða breyting á niðurtogshönnun bílsins. Líklega er um að ræða síðustu stóru breytinguna á tímabilinu. McLaren vill ná Red Bull og Ferrari með þessum breytingum, áður en liðið setur allt sitt afl í að þróa bílinn fyrir 2015.

„Það er rétt að við byrjuðum tímabilið með bíl sem skorti niðurtog og, á sama tíma, urðum við að breyta stefnu liðsins varðandi markmið,“ sagði keppnisstjórinn Eric Boullier.

„Ég hygg að uppfærslan sem við komum með til Austurríkis sé nógu góð til að loka bilinu á milli okkar og allra fyrir framan okkur,“ sagði Boullier.

Hann varar þó við að uppfærslurnar muni ekki duga til að ná Mercedes bílunum sem hafa drottnað á tímabilinu.