Oddvitaáskorunin - Opnari stjórnsýsla

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Arna Lára Jónsdóttir leiðir Í-listann í Ísafjarðarbæ í sveitarstjórnarkosningunum í vor.

Ég, Arna Lára Jónsdóttir er oddviti Í-listans, lista íbúanna í Ísafjarðarbæ. Ég er næstum því 38 ára, verkefnastjóri á Nýsköpunarmiðstöð Íslands. Ég er í sambúð með Inga Birni Guðnasyni bókmenntafræðingi og er móðir þriggja barna, Hafdísar, Helenu og Dags. Ég er með BA próf í stjórnmálafræði og hef lagt stund á viðskiptafræði á meistarastigi.

Auk þess að hafa brennandi áhuga á pólitík og vilja vinna vel fyrir samfélagið sitt, get ég verið óttalegt sófadýr með hljóðbók í eyrunum og prjóna í höndunum, þess á milli sem ég er á útopnu við að sækja ýmiskonar menningarviðburði og uppákomur í sveitarfélaginu.

Helstu áherslumál okkar á Í-listanum er að gera sveitarfélagið okkar meira aðlaðandi fyrir ungt fólk til búsetu, því það er lykilinn af jákvæðri byggðaþróun. Þess vegna leggjum við mikinn metnað í að skapa góðan grunn fyrir fjölbreytt og þróttmikið atvinnulíf.

Við setjum líka fræðslumálin á oddinn, en við viljum búa börnin okkar betur undir framtíðina með því að leggja áherslu á framsækið skólastarf þar sem frumkvöðla- og tæknimennt er gert hátt undir höfði.

Umhverfismálin eru okkur mjög hugleikin og við ætlum að tryggja áframhaldandi vinnu við umhverfisvottun Vestfjarða, auk þess sem við viljum draga verulega úr plastpokavæðingu samfélagsins.

Við ætlum að gera stjórnsýsluna opnari og auka upplýsingamiðlun. Við sækjum umboð okkar og stefnu til íbúanna og til að virkja betur það samband þurfum við að leggja meiri metnað í íbúalýðræði. Áfram Í-listinn!

YFIRHEYRSLAN

Hver er fallegasti staðurinn á Íslandi?

Ég á mér marga fallegustu staði á landinu. Rauðisandur á sumarnóttu er alveg ósmótstæðilegur, að finna fyrir ægilegri fegurð á brún Hornbjargs, upplifa tignarleikann í Skaftafellinu og svo er þykir mér Ásbyrgi líka tilkomumikið.

Hundar eða kettir?

Kettir verð ég að segja þó mér þykir hundavinir mínir Gosi og Benni dálítið skemmtilegir.

Hver er stærsta stundin í lífinu?

Ég hef átt margar stórar stundir en ég er alveg viss um að ég eigi enn eftir að upplifa stærstu stundina.

Hver er uppáhaldsmaturinn þinn?

Ég er veik fyrir indverskum mat.

Hvernig bíl ekur þú?

Huyandai Santa Fe sem gerir enn sitt gang þótt hann sé orðinn lúinn.

Besta minningin?

Ég heimsótti Sikiley fyrir nokkrum árum og lifi enn á þeim góðu minningum.

Hefur þú verið tekin af lögreglunni?

já, tvisvar fyrir of hraðan akstur.

Hverju sérðu mest eftir?

Að hafa ekki ferðast meira.

Draumaferðalagið?

Draumaferðalagið mitt þarf að innihalda góða ferðafélaga, gott veður og góðan mat og þá skiptir litlu hvað áfangastaðurinn heitir.

Hefur þú migið í saltan sjó?

Já í bókstaflegri merkingu.

Hvað er það skrýtnasta sem þú hefur gert?

Ég fékk einu sinni áru mína teiknaða, og þá kom í ljós að ég var þræll viðskiptamanns í fyrra lífi. Ég er enn að melta þessar upplýsingar.

Hefur þú viðurkennt mistök?

já, það hef ég gert.

Hverju ertu stoltust af?

Börnunum mínum þremur.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.