Mercedes óstöðvandi í Malasíu

Lewis Hamilton á Mercedes kom fyrstur í mark í Malasíukappakstri Formúlu 1 sem fram fór í morgun. Nico Rosberg, liðsfélagi hans, varð annar og heimsmeistarinn Sebastian Vettel hjá Red Bill þriðji. Um aðra keppni tímabilsins var að ræða og gerði mikill hiti og raki ökumönnum erfitt fyrir. Er talið að þeir ökumenn sem luku keppni hafi misst um þrjú kíló af vökva.

Mercedes hefur ekki náð fyrstu tvemur sætunum í keppni síðan í ítalska kappakstrinum 1955.

„Liðið hitti rétt á öll þjónustuhlé,“ sagði Lewis Hamilton eftir keppnina sem var sú hundraðasta sem Hamilton klárar í stigasæti. Á hæla hans kom Nico Rosberg.

„Eftir aðra beygju einbeitti ég mér að því að reyna að ná Lewis, hann var of snöggur í dag,“ sagði Nico Rosberg á verðlaunapallinum. Heimsmeistarinn var þrátt fyrir allt nokkuð sáttur með þriðja sætið.

„Það er gott að ná aftur á verðlaunapall, eftir að Daniel (Ricciardo) var á palli í Ástralíu,“ sagði Sebastian Vettel.

Fyrir keppnina var Valtteri Bottas á Williams færður aftur um 3 sæti í rásmarkinu og fékk 2 punkta á leyfið sitt, fyrir að hafa tafið Ricciardo í tímatökunni.

Sergio Perez hóf ekki keppni, hann komst ekki í tæka tíð út á brautina. Vélin í bíl hans fór í ham sem leyfir henni að haltra heim, þegar hún er að fara að ofhitna. Force India tókst ekki að koma bílnum í gang til að ræsa á þjónustusvæðinu.

Tímatakan fór fram í rigningu í gær og því gátu allir valið dekkjagerð til að hefja keppnina á. Allir völdu mýkri gerð helgarinnar, meðalhörðu dekkin.

Pastor Maldonado og Jules Binachi rákust saman í annarri beygju, afturdekk sprakk á bíl Bianchi. Honum var svo refsað með 5 sekúndna bið áður en nokkuð mátti gera við bíl hans á þjónustusvæðinu.

Á öðrum hring rakst Kevin Magnussen á Kimi Raikkonen og sprengdi hægra afturdekkið. Magnussen var refsað með sömu 5 sekúndna refsingu og Bianchi.

Maldonado var sagt að hætta keppni á hring 7. Lotus er því greinilega enn í vanda með bíl sinn.

Jean-Eric Vergne hætti keppni á 20. hring. Adrian Sutil stöðvaði á 34. hring á miðri braut. Hann skapaði þó ekki næga hættu til að kalla þyrfti út öryggisbíl.

Kimi Raikkonen sagði í talstöðinni að það væri farið að rigna á hluta brautarinnar á hring 35. Ekkert varð þó úr að það rigndi í keppninni.

Adrian Sutil hætti keppni á hring 34. Esteban Gutierrez kom á þjónstusvæðið á hring 37 og hætti keppni. Þar með var Sauber liðið fallið úr keppni.

Afleitt dekkjastopp á hring 41 gerði út um möguleika Daniel Ricciardo á Mercedes í baráttu um verðlaun, hann var í 4. sæti þegar hann kom inn. Vinstra framdekkið var ekki orðið fast á bílnum þegar honum var hleypt af stað. Það þurfti að ýta honum til baka og festa dekkið.

Á hring 44 brotnaði framvængurinn af bíl Ricciardo. Hann þurfti því að taka annað þjónustuhlé. Ricciardo fékk svo refsingu fyrir að fara af stað með laust dekk, hann þurfti að koma á þjónustusvæði og stöðva í 10 sekúndur. Ricciardo hætti á hring 52, hann var ekki í stigasæti og langt frá því að ná í stig. Red Bull hefur væntanlega viljað spara vélina.

Williams liðið sagði við Felipe Massa: „Valtteri (Bottas) er fljótari en þú, ekki halda aftur af honum.“ Massa var þó ekki á því að auðvelda Bottas að komast fram úr. Massa endaði fyrir framan Bottas sem komst þó ansi nálægt Massa.

„Ég tel mig hafa gert eins vel og ég get. Markmiðið var að ná í eins mörg stig og ég gat, fyrir liðið og fyrir mig. Valtteri komst ekki fram úr mér og það hefði verið erfitt að komast fram úr Jenson líka,“ sagði Massa. Hann var ekki sáttur við skipanir frá liði sínu.

„Ég fann fyrir mikilli virðingu frá liðinu mínu þangað til fyrir stundu,“ sagði Massa. Hann sagðist ekki vilja tjá sig nánar um uppákomuna enda væri best að liðið ræddi saman fyrst. Þeir Massa og Bottas höfðu eki rætt saman á þeim tímapunkti.

„Þegar á heildina er litið var þetta góð keppni, báðir bílar í stigasæti,“ sagði Bottas eftir keppnina.

1.Lewis Hamilton - Mercedes

2.Nico Rosberg - Mercedes

3.Sebastian Vettel - Red Bull

4.Fernando Alonso - Ferrari

5.Nico Hulkenberg - Force India

6.Jenson Button - McLaren

7.Felipe Massa - Williams

8.Valtteri Bottas - Williams

9.Kevin Magnussen - McLaren

10.Daniil Kvyat - Toro Rosso

11.Romain Grosjean - Lotus

12.Kimi Raikkonen - Ferrari

13.Kamui Kobayashi - Caterham

14.Marcus Ericsson - Caterham

15.Max Chilton - Marussia

16.Daniel Ricciardo - Red Bull - Kláraði ekki

17.Esteban Gutierrez - Sauber - Kláraði ekki

18.Adrain Sutil - Sauber - Kláraði ekki

19.Jean-Eric Vergne - Toro Rosso - Kláraði ekki

20.Jules Bianchi - Marussia - Kláraði ekki

21.Pastor Maldonado - Lotus - Kláraði ekki

22.Sergio Perez - Force India - Hóf ekki keppni

Rosberg er nú efstur í heimsmeistarakeppni ökuþóra með 43 stig og Hamilton annar með 25 stig. Mercedes náði forystu í keppni bílasmiða með 68 stig, McLaren er í öðru sæti með 43 stig og Ferrari í þriðja með 30 stig.