Enn eitt bakslagið hjá Barcelona

Barcelona mátti þola óvænt tap er liðið mætti Real Valladolid í spænsku úrvalsdeildinni í dag.

Real Valladolid, sem sat í fallsæti í upphafi dagsins, vann 1-0 sigur með marki Fausto Rossi á 17. mínútu.

Börsungar voru mun meira með boltann en áttu erfitt með að brjóta niður þéttan varnarmúr Valladolid en heimamenn áttu þar að auki nokkrar hættulegar skyndisóknir.

Barcelona hefði farið á topp deildarinnar með sigri í dag en liðið er einu stigi á eftir Real Madrid sem á leik til góða. Atletico Madrid er svo í þriðja sæti með 61 stig, tveimur á eftir Barcelona, en liðið mætir Celta Vigo í kvöld.