Komast Sverrir og Ingi í góðan hóp?

Sverrir Þór Sverrisson, þjálfari Grindavíkur, og Ingi Þór Steinþórsson, þjálfari Snæfells, eiga báðir möguleika á því að komast í fámennan hóp geri þeir lið sín að bikarmeisturum í dag en þá fara fram úrslitaleikirnir í Poweradebikar karla og kvenna  Snæfell mætir Haukum í bikarúrslitaleik kvenna en hjá körlunum spila Grindavík og ÍR um bikarinn.

Aðeins fjórum þjálfurum hefur tekist að gera bæði karla- og kvennalið að bikarmeisturum og bæði Sverrir Þór og Ingi Þór fá nú sitt annað tækifæri til að bætast í hópinn.

Hópinn skipa núna þeir Einar Bollason (5 sinnum karlalið - 1 sinni kvennalið), Sigurður Ingimundarson (3 sinnum karlalið - 5 sinnum kvennalið), Jón Kr. Gíslason (2 sinnum karlalið - 2 sinnum kvennalið) og Falur Harðarson (1 sinni karlalið - 1 sinni kvennalið).

Sverri tókst ekki að öðlast aðild í fyrra þegar Grindavík tapaði á móti Stjörnunni í úrslitaleik og Snæfellskonur töpuðu undir stjórn Inga Þórs árið 2012. Sverrir gerði kvennalið Njarðvíkur að bikarmeisturum og karlalið Snæfells varð bikarmeistari undir stjórn Inga Þórs árið 2010.