Sektaður um sex milljónir fyrir að þegja

Algengt er að íþróttamenn séu sektaðir fyrir að láta óviðeigandi orð falla. Þannig fór ekki fyrir Marshawn Lynch. ESPN greinir frá.

Hlauparinn knái hjá Seattle Seahawks í NFL-deildinni fékk sekt á dögunum fyrir að tjá sig ekki, þ.e. ekki nógu reglulega. Forsvarsmenn NFL-deildarinnar áttuðu sig á því á dögunum að Lynch hefði sniðgengið fréttamenn á tímabilinu sem samrýmist ekki reglum deildarinnar.

Lynch gaf sig reyndar aldrei þessu vant á tal við fréttamenn síðastliðinn föstudag. Það var hins vegar of seint að mati forsvarsmanna deildarinnar.

Sekt Lynch nemur 50 þúsund dölum eða jafnvirði um 6 milljóna íslenskra króna. Seahawks tekur á móti New Orleans í úrslitakeppninni á laugardaginn.