Myndlist á Íslandi í háum gæðaflokki

Verkið Hliðstæður eftir Steinunni Þórarinsdóttur var í síðustu viku sett upp við flugvöllinn í San Diego í Kaliforníu.

Steinunn hefur síðustu ár sýnt verk sín víða um heim og uppskorið mikla athygli.

„Þetta var mjög skemmtilegt verkefni. Ég hef verið að starfa og sýna víða og er með gallerí sem starfa fyrir mig í London, Kaupmannahöfn, Toronto og í Bandaríkjunum,” segir Steinunn, sem er nú með sýningu í Tveimur Hröfnum í Reykjavík. Sýningin er fyrsta einkasýning hennar hér á landi síðan 2006 en henni lýkur 30. nóvember.

„Það er frábært að sýna í Gallerí Tveimur Hröfnum. Þar er unnið faglegt og gott starf. Ekki veitir af því að auka við flóruna hér á Íslandi. Ég er þakklát fyrir þau tækifæri sem ég hef fengið erlendis. Það er svo gott að finna að það sem maður gerir sé metið. Mér finnst líka gaman að sýna á Íslandi þar sem ræturnar liggja.”

Steinunn segir myndlistina á Íslandi í háum gæðaflokki og ótrúlega mikið að gerast. Það vanti samt opinberan stuðning því fáir átti sig á því hversu mikilvæg myndlistin er.

„Akkúrat núna ætti að styðja við hana en ekki draga úr stuðningi eins og virðist vera að gerast. Það mun skila sér margfalt.”

Verk eftir Steinunni er að finna víða.

„Mörg útiverka minna hafa verið risaverkefni í rauninni, eins og minnisvarðinn Voyage í Hull og För á Vík í Mýrdal. Þetta er eitt listaverk í tveimur löndum. Þau voru afhjúpuð með viku millibili. Það furðulegasta sem komið hefur fyrir á mínum ferli var svo þegar verkinu í Hull var stolið ofan af 4 metra hárri stuðlabergssúlu. Þetta voru einhverjir galdramenn og verkið fannst aldrei. Sem betur fer var systurverkið til í Vík þannig hægt var að taka mót af þeirri fígúru og steypa aftur verkið fyrir Hull. Síðan var verkið endurafhjúpað í fyrra. Þá leið mér eins og Bill Murray í kvikmyndinni Groundhog Day en hann vaknaði alltaf upp við endurtekningu á sama degi.“ 

Framundan hjá Steinunni er sýning í Kaupmannahöfn í vor og einnig stór sýning hjá þekktum listaverkasafnara á einni stærstu vínekru í Vancouver í Kanada, Mission Hill Family Estate. Hún kynntist eigendunum fyrst á Íslandi.

„Við hittumst hjá sameiginlegum vinum, Luis og Mary Arreaga, sendiherrahjónum Bandaríkjanna hér á landi. Þetta verður stórt verkefni sem gaman verður að takast á við,” segir Steinunn að lokum.