"Þurftum góðan dag eftir slæma tímatöku“

Þjóðverjinn Sebastian Vettel hjá Red Bull bar sigur úr býtum í belgíska kappakstrinum sem fram fór í gær. Vettel tók fram úr Lewis Hamilton hjá Mercedes í upphafi kappakstursins en Hamilton var á ráspól.

Þegar leið á kappaksturinn náði Fernando Alonso hjá Ferrari að komast fram úr Hamilton og krækti í annað sætið. Alonso náði að vinna sig úr níunda sæti upp í annað sæti og var í raun sigurvegari dagsins í gær.

Þetta var fimmti sigur Vettel í ár en alls eru búin ellefu mót á tímabilinu. Þjóðverjinn er í efsta sæti í keppni ökumanna, 46 stigum á undan Fernando Alonso. „Þetta var frábær kappakstur,“ sagði Vettel eftir mótið í gær.

„Alveg frá byrjun til enda voru menn að berjast gríðarlega. Það var ótrúlega mikilvægt fyrir mig að taka fram úr Hamilton á fyrsta hring, það gerði það að verkum að ég gat stjórnað kappakstrinum allan tímann og var í raun aldrei í neinum vandræðum.“

„Við þurftum að eiga góðan dag til að komast á pall og sérstaklega eftir slæma tímatöku á laugardaginn,“ sagði Fernando Alonso eftir kappaksturinn.

„Bíllinn hagaði sér vel í dag og ég gat keyrt á mínum hraða allan tímann. Ég var aldrei í vandræðum með að halda öðru sætinu eftir að ég tók fram úr Hamilton, var samt sem áður allt of langt frá Vettel til að keppa um sigurinn.“

Með sigrinum í gær er Vettel kominn með 197. stig Alonso 151. og Hamilton 139.

Lokaúrslit í Belgíska kappakstrinum:

1. Sebastian Vettel - Red Bull

2. Fernando Alonso - Ferrari

3. Lewis Hamilton - Mercedes

4. Nico Rosberg - Mercedes

5. Mark Webber - Red Bull

6. Jenson Button -Mclaren

7. Felipe Massa - Ferrari

8. Romain Grosjean - Lotus

9. Adrian Sutil - Force India

10. Daniel Ricciardo - Toro Rosso

11. Sergio Perez - Mclaren

12. Jean-Eric Vergne - Toro Rosso

13. Nico Hulkenberg - Sauber

14. Esteban Gutierrez - Sauber

15. Valtteri Bottas - Williams

16. Giedo van der Garde - Caterham

17. Pastor Maldonado - Williams

18. Jules Bianchi - Marussia

19. Max Chilton - Marussia.