Leiða saman tónskáld og tónlistarflytjendur

"Tónlistarhátíð unga fólksins hefur verið starfrækt í fimm ár en nú höfum við skipt pínulítið um áherslur og þess vegna breytt nafninu í Kammer – Tónlistarhátíð,“ segir Guðný Þóra Guðmundsdóttir, ein forsvarskvenna hátíðarinnar. „Við hlúum að grasrótinni, gefum ungu fólki tækifæri til að koma fram og bjóðum upp á fjölda námskeiða fyrir þetta unga fólk til að víkka sjóndeildarhringinn.“



Í boði verða tólf opinberir tónleikar á tímabilinu 7. til 17. ágúst, fjögur málþing, fyrirlestrar og fjöldi námskeiða. En hver stendur fyrir þessu? „Við erum fjórar tónlistarkonur sem höfum staðið fyrir hátíðinni frá upphafi,“ segir Guðný Þóra. „Þetta er í rauninni bara einkaframtak. Við erum allar tónlistarkonur og í rauninni var þetta upphaflega til að svala ákveðinni þörf. Við fundum fyrir því að það var ekki alltaf hægt að rjúka til útlanda á námskeið til að auka við sig. Síðan við byrjuðum hefur framboðið á námskeiðum hins vegar aukist mikið, þannig að þetta hefur greinilega haft áhrif út í samfélagið, sem er sérlega ánægjulegt og ber að fagna.“



Eitt af markmiðum hátíðarinnar er að leiða saman tónskáld og tónlistarflytjendur. „Mér hefur þótt vanta svolítið meira samtal á milli þessara aðila,“ segir Guðný Þóra. „Það hefur reyndar orðið mikil vakning varðandi nýja tónlist undanfarið, en það má alltaf gera betur.“

Um fjörutíu viðburðir verða á hátíðinni sem fer að mestu fram á Menningarreit Kópavogs og Salnum en auk þess í Hafnarhúsinu Tryggvagötu, Norræna húsinu og bílastæðahúsi Hörpu. Frekari upplýsingar má finna á www.musicfest.is.