Yngstur í góðum hópi

Elvar Már Friðriksson varð 18 ára í nóvember síðastliðnum en er í risastóru hlutverki hjá spútnikliði Njarðvíkinga sem hefur leik í úrslitakeppninni í kvöld. Elvar Már var meðal efstu manna í deildinni í vetur í bæði stigum (15. sæti) og stoðsendingum (9. sæti) og átti mikinn þátt í frábærri frammistöðu Njarðvíkurliðsins í seinni hlutanum.

Elvar Már skoraði 19,1 stig að meðaltali í deildarleikjunum 22 í vetur og komst þar með í úrvalshóp í Njarðvíkinni sem hefur framleitt marga af mestu stigatröllum úrvalsdeildarinnar í gegnum tíðina. Það hafa aðeins fjórir aðrir íslenskir leikmenn náð að skora yfir 19 stig að meðaltali fyrir Njarðvík í úrvalsdeildinni og enginn þeirra náði því fyrir 19 ára afmælisdaginn. Það eru enn átta mánuðir í það að Elvar blási á 19 kerti.

Logi átti metið í Njarðvík

Logi Gunnarsson átti áður metið en hann var ekki orðinn tvítugur þegar hann skoraði 20,7 stig að meðaltali fyrir Njarðvík í deildarkeppninni 2000-01. Hinir þrír eru þeir Valur Ingimundarson, Teitur Örlygsson og Brenton Joe Birmingham en sá síðastnefndi náði tveimur 19 stiga tímabilum eftir að hann fékk íslenskt vegabréf. Valur og Teitur áttu báðir sex tímabil þar sem þeir skoruðu 19 stig eða meira í leik, þar af skoraði Valur yfir 20 stig öll þessi sex tímabil.

Elvar Már fæddist í nóvember 1994 þegar faðir hans, Friðrik Ragnarsson, var á leiðinni að verða Íslandsmeistari með Njarðvík annað árið í röð. Friðrik skoraði mest 15,1 stig í leik á einu tímabili og er strákurinn þegar búinn að gera betur hvað varðar stigaskor á tímabili.

Elvar Már og félagar í Njarðvík fá verðugt verkefni í kvöld þegar þeir heimsækja Snæfell í fyrsta leik liðanna í átta liða úrslitum úrslitakeppninnar. Snæfell er aðeins eitt af tveimur liðum sem hinu unga liði Njarðvíkur tókst ekki að leggja í deildarkeppninni en hitt var deildarmeistarar Grindavíkur.

19+ stiga tímabil Íslendinga með NjarðvíkValur Ingimundarson 6 sinnum

Fyrst á 21. aldursári 1982-83

Teitur Örlygsson 6 sinnum

Fyrst á 22. aldursári 1988-89

Logi Gunnarsson 2 sinnum

Fyrst á 20. aldursári 2000-01

Brenton Birmingham* 2 sinnum

Fyrst á 30. aldursári 2001-02

* Varð Íslendingur í maí 2001

Elvar Már Friðriksson 1 sinni

Fyrst á 19. aldursári 2012-13



Flest stig Íslendings á tímabili fyrir Njarðvík í úrvalsdeild karla:25,7 Valur Ingimundarson 1984-85

25,7 Valur Ingimundarson 1986-86

23,9 Valur Ingimundarson 1983-84

23,3 Valur Ingimundarson 1982-83

22,0 Brenton Birmingham* 2001-02

21,8 Valur Ingimundarson 1986-87

21,2 Teitur Örlygsson 1995-96

21,0 Brenton Birmingham* 2007-08

20,8 Teitur Örlygsson 1992-93

20,9 Logi Gunnarsson 2008-09

20,7 Logi Gunnarsson 2000-01

20,6 Valur Ingimundarson 1987-88

20,3 Teitur Örlygsson 1991-92

19,9 Teitur Örlygsson 1990-91

19.9 Teitur Örlygsson 1988-89

19,3 Teitur Örlygsson 1989-90

19,1 Elvar Már Friðriksson 2012-13

* Varð Íslendingur í maí 2001